حاج صمد قاسمپور

وار سوزوم، باشلاییرام ائللر اوچون یاشیلی گوزایله

قان اوره ک، داغلی سوزیله

یارا کونلوم سوروشور، باشلادیغین سوز نه دی قارداش

بو نه سوز دورکی،اوره کلرده تلاطمده دی قارداش

سئویله مکده ن یوخاری گورمه دی قارداش

دئه مک افسانه دی قارداش

یاش گوزومده ن اَلَه نرکن، کاغاذ ایسلاندی،یاش اولدو

گوزیاشیم سئلله نیب، اروند ده ن آخماقدا باش اولدو

بیرنئچه کیپرییی قان یاشیله گوردوم هاماش اولدو

ئینه گوزیاشیله دولدو

ئینه دوران کاغاذ اوسته دوران دوتدی دولاندی

ئینه اروند ده کی صحنه جان آلدی تازالاندی

ئینه غملر قالاغ اولدو یغیشیب قالدی قالاندی

دوزومون قابی جالاندی

ایتیره رکن اوزومو، گاه دولانیب گاه دایانیردیم

گاه اویوب، گاه اویانیردیم

ده لی اروندی تانیردیم ده لی اروندی تانیردیم،

نئجه طوفان ائله میشدی

گئجه نین سون چاغی غواصلارا طغیان ائله میشدی

بدر و خیبر آجیغین سینه ده پنهان ائله میشدی

قانلارا، قان ائله میشدی

منی وجدان سیخاراق قان ترایچینده بوغولوردوم

بوغولارکن ئینه باشدان جان آلیب جان دوغولوردوم

دانناق آلتیندا قالیب گاه اوغولوردوم

آللاهیندا قاپیسیندان قووولوردوم

بو حزین پرده نی گورمه کده پوزولدو نئجه حالیم

قاراکیپریکلری غواصلارا بَنزه تدی خیالیم

اود، دوروب اودلادی بیر لحظه ده، سونموشدوم آلیشدیم

اوج محنتده چالیشدیم

قلم ایسته رکی سوقوربانلاری، غواصلارا یازسین

تیتره ییرال، یازابیلمیر

هوولده ن آزقالیر آغزیم، قورویارکن سوزون آزسین

سوز گوزه ل دور، آزابیلمیر

قلمیم ایسه ییری، تا یازا غواص بالالاردان

اوره گیم سویلیه ایللربویو، سیزقین یارالاردان

اویورلمازقارالاردان

کیم یازیر، گور هارالاردان

یوخ سوقوربانلارینی وصف ائده، قدرت قلمیمده

یوخدی ایثار حدیثین یازا، جرات قلمیمده

یوخ لیاقت قلمیمده

اونلارین نیسگیلینه موجلار آغلار، بلم آغلار

کاغاذ آغلار، قلم آغلار

بیلمیرم خیرداجا بیر کلمه ده قدرت نه قدر وار

هامی قارداش قانا بیلمز

بیلمیرم عاشیق اولان قلبیده جرات نه قدر وار

بونوکیمسه آنابیلمز

طبع شعریم دایانارکن دئیری سوزده اثر یوخ

عملین اولماسا، یازساندا یاوان سوزدو کسر یوخ

آغاجین اولسادا، بَریوخ

یاش گوزومده ن آخاراق سئویله دیم اِی طبع دایانما

آرخایین اُول، منی دانما

دوزدو یوخدور عمل آمما، قارا باغریمدا یارام وار

بو گوزل بنده لریله تانیشام من ده، آرام وار

کیمسه یه یازمالییام، هاردا هارام وار؟!

من ده عشق اهلییم اما هله منصور اولابیلمم

بالاجا زمزمه یم، نغمه پرشور اولابیلمم

ذره یم، نور اولا بیلمم

غرق اولوب جومموشودوم موجلی دریای خیاله

قان اولارکنده اورک دولدی سرشکیله پیاله

قلم ایله، کاغاذی اوز، اوزه چاخناشمادا گوردوم

ده لی اروندی آیاق باش، باش ایاق داشمادا گوردوم

قانی، قایناشمادا گوردوم

قانلی نخلستانا باخدیقجا، سچیل میشلری گوردوم

قارا، گیئمیشلری گوردوم

آیلیریق آخشامی کند ایچره نه هایلار، نه هارایلار

آیریلیق دائمی اولدو، نه بیرآیلار، نه مین آیلار

یار، اوز یارینی هایلار

اوقارانلیق«سوله لر» ایچره عجب زمزه مه لر وار

قانلی اروند کناریندا بویوک خاطره لر وار

نخل لرایچره نه لر وار؟!

یا حسین نغمه سی کندی بورویرکن، اوجالیردی

بیری ایسته گلی سی نه، چاتماغی نین قولون آلیردی

آللاهی یاده سالیردی

بیری باش سجده ده، معبوده مناجات دئیردی

بیری ده آیریلیقین خلعتین، عشقیله گئیردی

نه لر آللاهه دییردی؟!

بیری نین گوز یاشی لئیسان کیمی گوزده ن اله نیردی

بیری بیر گوشه ده اوز، تورپاغا قویموش، مه له ییردی

نئجه سس سیز دیله نیردی

یا غیاث المستغیثین یا اله العالمین

یا غیاث المستغیثین یا ولی المومنین

انا عبدک الذلیل انا عبدک الضعیف

بیری ده کرب و بلا سمتینه حسرت له باخیردی

گوزونون یاشی آخیردی

یاحسین یا حسین، گه لیریک ها، آغاجان

بئله کی معلوم اولور، دینجه لیریک ها، آغاجان

سنده ن اوترو مه لیریک ها، آغاجان

آللاهین دا، اَلَه یی اووسه له ییب سونراسئچیردی

سئچی لنلر، هامی بیر بیر اَلَه نَرکنده گئچیردی

هامیسی جام بقاده ن سوایچیردی

آیری بیر عالمی دیر، آخشام، اوگون نخل لرایچره

بئله بیر عالم اولارمیش؟!

گَره ک اوستاد طریقت اوتوروب درس آلا قارداش

وورا، زانوی تعلم ئیره حیران قالا قارداش

شمس او خلوتگهه بیر لحظه اگر یول سالا قارداش

قاییدار دال-دالا قارداش

اوردا عرفان باش آلیب اوج دوتارکن هاوالاندی

سیندی سرین قور وغو، پرده لر اوردا،آرالاندی

سان تماشاگه رازین دا حجابی پارالاندی

اوردا نامحرم اولانلار قووالاندی

اورانین عالمی باشدان-باشا حالدیر،داها قال یوخ

اوردا دیدار اوقده ر واردی کی معشوقه مجال یوخ

شهدا مَهدی، بقا عالمدیر، اوردا زوال یوخ

اوردا حالدیر، داحا قال یوخ

اورا بیریئه دی کی آهولری مافوق ختن دیر

اورابیر یئردی هامی لاله لری پاره بدن دیر

اوردا باشدان باشا، گوز ایشلیه لی،سرو و سمن دیر

اورا بیرآیری وطن دیر

اورا مهد شهدا دیر، اورا خرگاه ولادیر

اورا معبد، اورا مسجد، اورا محراب دعادیر

حرم امن خدا دیر

گون چونوب آخشام اولوب یئتدی ملاقات زمانی

باشلادی وئردی یانیق سَسله، موذن بیر اذانی

بیر اذانی کی سالیب لرزیه جانی هامی نین قاینادی قانی

سانکی زهراء(س) بویوران لحظه بلال وئردی اذانی

خانمین سون نفسی، آزقالیری آیریلا جانی

بلالین آخیر اذانی خانمین چیخماداجانی

هامی قان آغلایاراق باشلادیلار قانلی نمازی

\هامی باش سجده وصلت ده ائدیر راز و نیازی

نَه دَه رین راز و نیازی نه نمازی

بیر نمازی کی ملک لر هامی صف باغلادی قارداش

غرق دریای عبادت هامی قان آغلادی قارداش

سینه لر داغلادی قارداش

عرش اعلاده ملک لر هامی حسرتله دئیردی

نه گوزه ل بنده لرین وار!

نئجه رزمنده لرین وار!

قاش قارالدیقجا داها پالچیق اوتاقلار بوشالیردی

بیربیرینده ن هامی آیریلمادا، گوزلر یاشالیردی

کربلا صحنه سینی یاده سالیردی

آیریلیق واختی یتیشدی هامی آغلاشمادا قارداش

بیر، بیرین باغرینا باسماقدا، حالا للاشماداقا قارداش

جبرئیل تکجه جهادین قاپیسین آچمادا قارداش

هامی غواصلار اوزاقلاشمادا قارداش

قارا گئیدیکده هاوا، قاره گئینلر قارالاندی

قارا پالتارلیلارین گردانی کوچدو، آرالاندی

کیمسه یه دوینا قالاندی؟

گون باتار کن شفق آلتیندا هاوا قاره گیئیردی

یئل ده چیرپیب اوزونو نخل لره بئیله دئیردی

بوگئجه مو جلو اروند بوتون قان اولاجا قدیر

بوگئجه سئوگیلی گوللر سارالار کن سولاجاقدیر

بوگئجه چوخلو بلم لرایچینه قان دولاجاقدیر

نخل لرساچ یولاجاقدیر

بوگئجه چوخلاری اروندده مظلوم یاتاجاقلار

بوگئجه آللاها عشاق، فقط جان ساتاجاقلار

بوگئجه بیرگئجه دیرعالمی گوزده ن آتاجاقلار

بزم یاره چاتاجاقلار

بوگئجه چوخلو رقیه دوروب آغلار اولار، اولماز؟

اَریده ن دونیادا داغلاری بو داغلار اولار اولماز؟

چوخلی لئیلا بوگئجه، اکبرینه آغلایاجاقدیر

عالمی داغلایاجاقدیر

نخل اسلامه ده غواص بوگنجه قان وئره جکدیر

قان وئره رکن اوزو قانسیزلامادا، جان وئره جکدیر

جانی قوربان وئره جکدیر

اولماسا یاره سی کیمسه، حرم یاره گئدنمز

هر گوزون اولماسا قان پرده سی دیداره گئدنمز

هر باش عالمده بلی عزتیلن داره گئدنمز

بزم دلداره گئدنمز

یئیتشر بیر یئره، ائیلَر اُوز-اوزونده ن سفر عاشق

عشق میدانینه شوقیله اولار رهسپر عاشق

حلقه داری گوروب قانلی لب ایله، اوپر عاشق

اولین مرحله عشقیده باشدان گئچر عاشق

بو هیاهویدا شوقیله گَلیب قافله گئچدی

ساقی بزم شهادت، گوزل انسانلاری سچدی

قان شرابین، هره ظرفیتی نین قدری جه ایچدی

فقط اللاه، هامی هئچدی

تا«ترانی» سسی معشوقد ن اُول جَمعه یئتیشدی

جام اروندوده تا جلوه دلدار گوروشدی

دسته دسته سوداباتماقدا،اوشاقلار یولا دوشدی

بو سفرآیری بیر ایشدی

آیری یول، آیری گئدیشدی

داها گوز گورمه دی مظلوم بالالاردان اَل اوزولدو

گوزمون پرده سینه قات قاریشیق صحنه دوزولدو

سونرا تا صبح اچیلینجا قلم عاجزله مَه دِیدی

نگران با خماداگوزلر، سحری گوزله مَه دیدی

فجر صادق یاریلارکن، گئجه نی بیزله مه دیدی

ظولمتی دیزلمه دیدی

تکئجه اللاه بیلیر، صبح اچیلینجا نَه لَر، اولدو

ظولمتین باغری ده لیندی، قاش آغاردی سحر اولدو

قارالیق دربدر اولدو

گئجه غواصلارا زهرای بتول(س) آرخا دایاندی

قوپدو بیر قائله، خط سینمادا دوشمان قووالاندی

نعش، نعش اوسته قالاندی

سحر اروند جوشوب، موج ووروب باشدان آشیردی

هله وور-سیندیریدی خط ده،اوشاقلار ساواشیردی

یخیلیب بعضی سی اروندده قانه بولاشیردی

هله بعضی سی یاشیردی

قان بلم لرده داشیردی

داحا صبرین چاناغی چارپالانار کن جالانیردی

نگران گوزلریم ارونده باخیردی، سولانیردی

آختاریردی، تاپابیلمیردی، دوروردو، دولانیردی

هانی عبداله شکوفه، هانی سردار دلاور؟

هانی منصور، هانی محسن؟هانی جانباز تکاور؟

هانی راشد؟هانی دباغی و سلطانی و نادر؟

هانی کاظم، هانی الوانی و نجاری و قادر؟

مهدوی لر هانی، سجاد و رضالر هارا گئتدی؟

شیخ علی لر هانی، با عشق و صفالر هارا گئتدی؟

بئله کی معلوم اولور، عشقلی باشلار دارا گئتدی!

بالاسین گورمه میش عباس، اوره یئینده یارا گئتدی

چوخ اوره کلر پارا گئتدی

یری دیر مظلوم اولان مشدعلی ده ن ده یاد اولسون

بلم ایچره او غریبانه دوشنده ن آد اولسون

پاک روحی شاد اولونسون

شهداء محفلی مقتلده قورولموش نه صفالی

بزم جاناندا، هامی جمع ایدی شمعین یری خالی

یانا، تا آرتیرا حالی

او وفا مجلسی نین واردی نه قیلی نه ده قالی

اورا، بوردان چوخ آرالی

ناگهان موج ووروب بیر بلمی ساحله قارداش

ارجمندی ده شمع اولدو او گوزه ل محفله قارداش

دولدو، دوغرولدو سینیق قافله قارداش

بلم ایچره باشی نین قان شفقین شاخمادا گوردوم

عشق اودیلن اَرییب، شمع کیمی آخماد گوردوم

یاندیریب یاخمادا گوردوم

گوز دوشوب گوردو نئجه قانه بویانمیش قره لردن

قوی دئیم منظره لردن

بیر طرفده ییخیلان قول-بویون اوچ یولداشدی گوردوم

بیر طرفده یارالی سیمه دولاشدی باشی گوردوم

بیر طرفده نئجه خورشیدییه باتمیش قاشی گوردوم

بیر طرفده باشی یوخ بیر یارالی قارداشی گوردوم

موژ ووران قان یاشی گوردوم

غسل تطهیر الونوب قانیله توفان آراسیندا

آخرین صبح نمازی قیلینیب قان آراسیندا

باخ بو سودایه، اولور جانیله جانان آراسیندا

قانلی میدان آراسیندا

باغری قان، گوزلری قان سجده سی سجاده سی قاندیر

می و میخانه سی قان، ساغری قان، باده سی قاندیر

بلمی قان، قلمی قان، وصیتنامه سی قاندیر

اوجا بوی قامتی قان پیکری قان جامه سی قاندیر

اوره گی قان، سینه سی قان،گوزیاشی قاندیر

یئری قان، تربتی قان، مقتلی قاندیر، باشی قاندیر

موج گهواره سی غواصلارا، لای لای اوخویوردو

او قوجالمیش قاری دا، رنگلی کمانین توخویوردو

نئجه سیسزقین اوخویوردو

لای لای ای جبهه لرین یورغونو، ای خسته جوانلار

لای لای ای شهد شهادت دن ایچیپ کامه چاتانلار

لای لای اروند کناریندا قیزیل قانه باتانلار

خوش یاتین ای قورو توپراقلارین اوستونده یاتانلار

خوش یاتین یاخشی یاتیب سیز

یاخشی باش فکرین آتیب سیز

یاخشی جانانه چاتیب سیز

دوزدی تاریخده حال اولمادی ایثاریزی یازسین

هله تئز دیر یازا بیلمز

دوزدی عالمده چیخار اولمادی اسراریزی قانسین

قارداشیم یوخ، قانا بیلمز

بوتون عالم یغیشا بیرجه آناز تک یانا بیلمز

بونو هئیچ کیم دانا بیلمز

دوزدو سس سیز یارالاندیز، سویا باتدیز، قانیز آخدی

دوزدو ظالیم قودوروب خنجرینی سینه زه تاخدی

دوزدو سیز جان وئره لی بوینو یوغونلار هامی باخدی

نیسگیلوز عالمی یاخدی

قوی قانیز آخسادا، آخسین اجنبی باخسادا باخسین

خنجرین تاخسادا تاخسین

نه قدرجسمیده جان وار

نه قدر قولدا توان وار

نه قدر داماردا قان وار

داها چیخماز یادیمیزدان، یادی نیز، دیلده قالاندیر

سیزین آواز ه عشقیز له جهان وارسا جهاندیر

باش اَیَن، سیز لره قارداش اوجا داغلار ،ساوالاندیر

باشی قار، سینه سی قاندیر

سیزین ائللرآرا، ایللر بویو، یادلار دا یادیز وار

آیریلیق داغی گورن قانلی اوره کلرده آدیز وار

آللاهیز وار هرزادیز وار

سیزلر آخیرده گئدیب مقصده چاتدیز بونا سوز یوخ

یاخشی باشدان،یاشایش فکرینی آتدیز بونا سوز یوخ

یاتدیز آمما یوخودان خلقی اویاتدیز بونا سوز یوخ

امما سیزلردن اوتور چوخ گئوزو یوللاردا قالان وار

سیز گئده نده ن سوئرا معلوم اولالی چوخ قوجالان وار

چوخلو رنگی سارالان وار

آنالار داغی سهندین داغی تک بیرجه داغ اولدو

چوخلو بئل سیندی بوکولدو، قارا بیرچکلر آغ اولدو

سحر، آخشام، گئجه گوز یاشلاری آخدی بولاغ اولدو

غم قالاندی قالاغ اولدو

او بولاغلار سئل اولوب کُفرائوی بر باد اولاجاقدی

او یانیق قلبلرین، آهی دا، فریاد اولاجاقدیر

یئر اوزو، داد اولا جاقدیر

بئله مظلوم لارین آهینی آللاه یئره سالماز

پوزولار ظالمین ارکانی، بوظولم آخیره قالماز

کفر بایراغی اوجالماز

گوره جاقسان باشا-باش ارض و سماء نوریله دولدو

اوندا بیردن گورسن دان ئیلی اسدی، سحر اولدو

فجر صادق ده سوکولدو، قارالیق دربدر اولدو

چوخ بیوک بیر ظفر اولدو

اوندا هر یئرده یاشیل بایراغی اَسمکده گوره رسن

اوندا انسان هامی، قارداش اوندا انسان هامی، قارداش

حاج صمد قاسمپور زمستان 1364 عملیات والفجر8 – عبور از اروند و فتح بندر فاو