دل نوشته فانی تبریزی
وصل يار
نولوردي عمرده بير نچّه لحظه فرصت اوليدي
او لحظه لرده منه وصل يار قسمت اوليدي
نولوردي خوي بهيمي وجودي ترك‌ايليه‌دي
نصيب هركسه عمرونده آدميّت اوليدي
نولوردي گوز گوره جاق گر گونوز تمام رذائل
دوشيدي شمس كسوفه زمانه ظلمت اوليدي
نولوردي نفسنون ادباريني گوريدي خلايق
جهاندا ترك غروريله هر منيّت اوليدي
نولوردي شُوم تمدّن كسيدي علقه بشردن
چهار ركن جهان جمله بربريّت اوليدي
نولوردي تك بوگونون گورمييدي ديدة غافل
صباح روز قيامت‌ده متن صحبت اوليدي
نولوردي فقر و فقيره حقارتيله باخانلار
بو گردش فلكيله دچار ذلّت اوليدي
نولوردي مصحف منزل اوليدي هادي امت
كلام حقّيله انسان آرا حكومت اوليدي
نولوردي هر دلي تقوا ايديدي وادي ايمن
تمام نوع بشر غرق نور و رحمت اوليدي
نولوردي حجّت حق عالمي ايديدي منوّر
او هاشمي مهه دستور، ختم غيبت اوليدي
نولوردي پيشرو كاروان جوامع ايچنده
عنايت حق سبحانيله او حضرت اوليدي
نولوردي فانيه يارب اوزون عنايت ايديدون
ختام عمري اونون ختم بر شهادت اوليدي