غزل های ترکی
آیینه کردار
عالمده سنون تک گوزلیم یار تاپیلماز
عاشقلریوه سن کیمی دلدار تاپیلماز
درمان ائله سن گوشه چشمیله اگر سن
بو شهرده بیر کس داخی بیمار تاپیلماز
آشفته اگر ایلیه سن لشگر زلفون
دنیاده گولوم غیر گرفتار تاپیلماز
باشدان ایاقا مهر و وفا، صدق و صفاسن
سن تک گوزلیم آینه کردار تاپیلماز
شیریندی زبس صحبتون ای ماه جهاندا
سن شیوه ده بیر صاحب کفتار تاپیلماز
ای واعظ بی ذوق دئمه اهل صفاده
تنبور و دف و چنگ و نی و تار تاپیلماز
غفلت یوخوسی چولقالیب اهل جهانی
آختارما کی بو عرصه ده بیدار تاپیلماز
آشفته ائدر عالمی، افکار پریشان
ایمان اولا گر خلقده ادبار تاپیلماز
فانی نه گوزل نظمه چکیب صحبت عشقی
آختارما کی بوندان شیرین اشعار تاپیلماز
@fanitabrizi